Boston Dynamics Atlas gumanoid roboti uchun yangi idrok tizimini taqdim etdi. Bu tizim robotning fazoda mo‘ljal olish va inson ishtirokisiz murakkab vazifalarni bajarish qobiliyatini sezilarli darajada yaxshilaydi. Endi robot obyektlarni aniq taniy oladi, ularning harakatini kuzatib boradi va ko‘rish maʼlumotlarini o‘z harakatlari bilan muvofiqlashtiradi. Bu unga haqiqiy sanoat sharoitida to‘liq mustaqil ishlash imkoniyatini beradi.
Ilgari asosiy eʼtibor robotning epchilligiga qaratilgan edi, ammo endi Boston Dynamics mustaqil ishlash uchun ko‘rish qobiliyati hal qiluvchi ahamiyatga ega ekanligini taʼkidlamoqda. Atlas turli obyektlar bilan o‘zaro aloqada bo‘lishi kerak va hatto detalni ushlash kabi oddiy harakat ham rivojlangan idrokni talab qiladi. Kompaniya 2D va 3D idrokni birlashtirgan, obyektlarning joylashuvini kuzatib boradigan hamda robot ko‘rayotgan narsalar va bajarayotgan ishlar o‘rtasidagi bog‘liqlikni aniq kalibrovka qiladigan ko‘rish tizimini ishlab chiqdi.
Dastlab, Atlas 2D obyektlarni aniqlash tizimi yordamida atrofni skanerlaydi. U muhim obyektlar va potensial xavflarni topib, ularning har birini ramka va asosiy nuqtalar bilan ajratib ko‘rsatadi. Xususan, Atlas zavodlarda ko‘pincha turli shakl va o‘lchamdagi javonlar bilan ishlaydi. Ularni tahlil qilish uchun tizim tashqi va ichki kalit nuqtalardan foydalanadi. Tashqi nuqtalar javonning umumiy shaklini, ichki nuqtalar esa alohida bo‘limlarning joylashishini aniq ko‘rsatadi. Bu robotga har bir bo‘limning joylashuvini aniqlash imkonini beradi.
Javondan detallarni olish uchun Atlas o‘zining ushbu obyektga nisbatan qayerda joylashganini aniqlaydi. Buning uchun maxsus dastur robot ko‘rayotgan narsalarni (obyektning asosiy nuqtalarini) oldindan saqlangan javon modeli bilan taqqoslaydi. Joylashuvni aniqlashda xatoga yo‘l qo‘ymaslik uchun robotning harakatlari ham hisobga olinadi. Bunday yondashuv asosiy nuqtalarning bir qismi ko‘rinmay qolganda yoki rakurs chalg‘itishi mumkin bo‘lganda foydalidir. Ichki va tashqi kalit nuqtalardan foydalanish butun javon va uning har bir bo‘limi holatini aniqroq belgilash imkonini beradi. Hatto javonlar bir xil ko‘rinishda bo‘lsa ham, Atlas ularni fazoviy “xotira”si va joriy vaziyatga tayanib farqlay oladi.
Atlas detalni ushlashi bilanoq, uning fazodagi harakatini kuzata boshlaydi. Buning uchun harakat haqidagi maʼlumotlar, vizual maʼlumotlar va kuch datchiklari ko‘rsatkichlarini birlashtirgan SuperTracker tizimidan foydalaniladi.
Bu orqali robot obyektning sirpanib ketmayotganini va ko‘rish maydonida qolayotganini tushunadi. Obyektning holati sintetik o‘quv maʼlumotlari yordamida aniqlanadi: tizim haqiqiy tasvirlarni CAD modellari bilan taqqoslaydi. Keyin u robotning harakatlanish cheklovlarini hisobga olgan holda baholashning aniqligini tekshiradi. Natijada obyektning holati millimetr aniqligida kuzatib boriladi.
Mayda harakatlarni bajarish uchun Atlasni aniq kalibrlash zarur. Robotning kamera orqali o‘z qo‘llari, oyoqlari va tanasini “ko‘rishi” ularning qayerda joylashgani haqidagi ichki tasavvuriga deyarli to‘liq mos kelishi kerak. Bu aniqlik detallarning eskirishi, haroratning o‘zgarishi va robotlarni ishlab chiqarishdagi kichik farqlarni qoplaydi.
Boston Dynamics‘ning taʼkidlashicha, bu hali boshlanishi, xolos. Keyingi qadam – ko‘rish va harakat alohida vazifalar emas, balki yagona jarayonning qismlari bo‘lgan fundamental modelni yaratishdir.