Sunʼiy intellekt tadqiqotchilarining aksariyati texnologiyalarni rivojlantirishning hozirgi yondashuvi umumiy sunʼiy intellekt (AGI) yaratilishiga olib kelishiga ishonmaydi. So‘rov natijalariga ko‘ra, ekspertlarning 84 foizi buning uchun faqat neyron tarmoqlarning o‘zi yetarli emasligini taʼkidlaydi, 60 foizdan ortig‘i esa AGI turli usullar, jumladan, ramziy sunʼiy intellektning uyg‘unligini talab qilishiga ishonch bildiradi. Shu bilan birga, respondentlarning atigi 23 foizi AGI‘ni ishlab chiqishni asosiy ustuvor vazifa deb hisoblaydi va uchdan bir qismi ishonchli nazorat choralari ishlab chiqilguncha bunday tadqiqotlarni to‘xtatib turishni qo‘llab-quvvatlaydi. Mutaxassislar, shuningdek, xarajatlar va xavfsizlik tahdidlarining oshishiga olib kelishi mumkin bo‘lgan sunʼiy intellektning “agentlashuvi” xavfi haqida ogohlantirmoqda.
Generativ sunʼiy intellekt tizimlari neyron tarmoqlari – miya ishlash tamoyillarini taqlid qilib, ulkan maʼlumotlar asosida o‘rganadigan kompyuter modellari asosida ishlaydi. So‘nggi o‘n yil ichida ishlab chiquvchilar o‘lchamlarni kengaytirish, masalan, o‘quv maʼlumotlari hajmini va model “parametrlari” sonini oshirish orqali ularning samaradorligini yaxshiladilar.
Sunʼiy intellektni rivojlantirish assotsiatsiyasi (AAAI) o‘tkazgan so‘rovda tashkilotning 475 aʼzosi ishtirok etdi, eʼtiborlisi, respondentlarning 67 foizi olimlardir. Ularning 84 foizi umumiy sunʼiy intellektni yaratish uchun faqat neyron tarmoqlarning o‘zi yetarli emas, deb hisoblaydi. AGI “barcha kognitiv vazifalarda insonga teng kelishi yoki undan ustun bo‘lishi” mumkin bo‘lgan tizim sifatida taʼriflanadi. Ammo AGI‘ga erishganlikni aniqlash uchun aniq mezon hozircha mavjud emas.
AAAI hisobotida neyron tarmoqlaridan tashqari, o‘rganishni talab qiladigan sunʼiy intellektning boshqa ko‘plab yo‘nalishlari mavjudligi taʼkidlangan va bu usullarni faolroq qo‘llab-quvvatlashga chaqirilgan. Ular orasida katta maʼlumotlarni tahlil qilish o‘rniga mantiqiy qoidalardan foydalanadigan ramziy sunʼiy intellekt ham bor.
So‘ralganlarning 60 foizdan ortig‘i inson tafakkur darajasiga faqat neyron tarmoqlar va ramziy sunʼiy intellekt uyg‘unligida erishilishiga ishonadi. Tahlilchilarning taʼkidlashicha, neyron tarmoqlar saqlanib qoladi, ammo taraqqiyot uchun ularni boshqa yondashuvlar bilan birlashtirish zarur.
So‘rov AGI paydo bo‘lsa, uning nazoratsiz rivojlanishidan xavotir borligini ko‘rsatdi. Respondentlarning 75 foizdan ortig‘i “qabul qilinadigan xavf va foydaning maqbul muvozanati”ga ega sunʼiy intellektni yaratish AGI ortidan quvishdan ko‘ra muhimroq deb hisoblaydi. Faqat 23 foizi AGI‘ni asosiy ustuvor yo‘nalish deb atadi. Taxminan 30 foiz ishtirokchilar esa bunday tizimlarning xavfsizligi va insoniyat uchun foydasini kafolatlash uchun ularni to‘liq nazorat qilish usullari ishlab chiqilmaguncha umumiy sunʼiy intellekt tadqiqotlarini to‘xtatib turish g‘oyasini qo‘llab-quvvatladi. Biroq, aksariyat ekspertlar to‘xtatib turishga qarshi va bunday variantni ehtimoldan yiroq deb hisoblaydi.
Aksariyat sunʼiy intellekt kompaniyalari hozirda “agentlar” – chiptalarni bron qilish yoki kod yozish va joriy etish kabi murakkab, ochiq vazifalarni bajara oladigan tizimlarni ishlab chiqmoqda. Biroq, fikrlar ikkiga bo‘linmoqda: sunʼiy intellekt modellarini “agentifikatsiya” qilishning foydasi ularni murakkablashtirish, hisoblash quvvati va energiya isteʼmolini oshirish xarajatlariga arziydimi?
Agentlar, shuningdek, yangi xavfsizlik tahdidlarini ham keltirib chiqaradi. Buni Kornell universitetining kompyuter fanlari bo‘yicha mutaxassisi, AAAI hisoboti hammuallifi Bart Selmanning tajribasi misolida ko‘rish mumkin. Selman agentdan matematika va dasturlashda foydalanadi, lekin shu bilan birga u har doim ham sunʼiy intellekt harakatlarini tushunmasligini tan oladi. “U mening Amazon Cloud‘imga kirib, mendan so‘ramasdan tajribalar o‘tkazishni boshlashi, yaʼni mening pulimni sarflashi xavfi bor”, deydi u.
Ko‘p jihatlarda noaniqlik saqlanib qolmoqda, masalan, “mulohaza”ning aniq taʼrifi yo‘q. Avtonom sunʼiy intellekt olimi qachon Nobel mukofotiga loyiq kashfiyot yaratadi, degan savolga eng ko‘p berilgan javob “Bilmayman” bo‘ldi.