Nvidia bosh direktori Jensen Xuang dasturlashning kelajagini kod yozish zaruratisiz tasavvur qilmoqda. No Priors podkastining yangi sonida u kapitalizatsiyasi 3 trillion dollar bo‘lgan kompaniyasining har bir muhandisi allaqachon Cursor AI-yordamchisidan foydalanayotganini aytdi. Uzoq muddatli maqsad — xodimlarni mexanik kod yozish jarayonidan to‘liq xalos etishdir.
«Muhandislarimiz umuman kod yozmay, faqat yangi, hali o‘rganilmagan muammolarni hal qilishsa, bu men uchun eng katta baxt bo‘lardi», — deb ta’kidladi Xuang. U kod yozishga pirovard maqsad emas, balki shunchaki vazifa sifatida qaraydi.
Bu g‘oya Xuang faol ilgari surayotgan «Maqsad va Vazifa» (Purpose vs Task) konsepsiyasiga asoslanadi. Uning fikricha, kod — bu bor-yo‘g‘i vosita, muhandisning haqiqiy missiyasi esa ilgari hech kim yechimini topmagan muammolarni aniqlash va hal qilishdan iborat.
Noyabr oyidagi xodimlar yig‘ilishida Xuang AIdan foydalanishni qisqartirish haqidagi takliflarga keskin munosabat bildirgan edi.
«Aqldan ozdingizmi? Men sun’iy intellekt yordamida avtomatlashtirish mumkin bo‘lgan har bir vazifa avtomatlashtirilishini xohlayman», — degan edi u.
Uning fikricha, bundan xodimlarning ishi yo‘qolib qolmaydi, aksincha, yanada ambitsiyali va mas’uliyatli bo‘ladi.
Radiologiya misoli Xuang kundalik vazifalarni avtomatlashtirish ish o‘rinlarini qisqartirmasdan, aksincha, ularning qiymatini oshirishini isbotlash uchun radiologiyani misol qilib keltirdi. Avvalroq AI sohasi kashfiyotchisi Jeffri Xinton kompyuterlar suratlarni tezroq o‘qiy olishi sababli radiologlarga ehtiyoj qolmasligini bashorat qilgan edi. Amalda esa radiologlar soni va maoshlari oshib bordi. Xuang buni shunday izohlaydi: suratlarni o‘qish har doim bir xil, takrorlanuvchi vazifa bo‘lib kelgan, mutaxassisning asl maqsadi esa — aniq tashxis va samarali davolashni tanlash. AI mayda ishlarni o‘z zimmasiga olgach, inson tajribasiga talab ortdi va shifokorlar murakkab vazifalarga diqqat qaratish imkoniga ega bo‘ldilar.
Boshqa gigantlarda vaziyat qanday? Google bosh direktori Sundar Pichai o‘tgan yili sun’iy intellekt kompaniyadagi yangi kodlarning 30 foizdan ortig‘ini yaratayotganini ma’lum qilgan edi. O‘z navbatida, Anthropic rahbari Dario Amodey ularning Claude modeli firmadagi barcha kodning 90 foizini generatsiya qilishini ta’kidladi.
Shubha va tanqidlar Ammo hamma ham AI-dasturlashga optimistik qaramayapti.
-
Cursor bosh direktori Maykl Truell «vayb-koding» (vibe coding) xavfidan ogohlantirdi. Bu yondashuvda dasturchilar AIga kodni nazoratsiz yozishga yo‘l qo‘yib beradilar.
-
Teslaning AI bo‘yicha sobiq direktori Andrey Karpatiy esa o‘zining Nanochat loyihasini qo‘lda yozishga majbur bo‘lganini, chunki AI-agentlar yetarlicha ishonchli chiqmaganini aytdi.
Model Evaluation and Threat Research tadqiqotiga ko‘ra, AI vositalariga ega tajribali dasturchilar aslida ularsiz ishlashga qaraganda 19 foizga sekinroq ishlamoqda (garchi o‘zlari 20 foizga tezlashdik deb hisoblasalar ham). Bu esa Xuangning «kodsiz kelajak» haqidagi tasavvurlari qanchalik real ekanini so‘roq ostiga qo‘yadi.