Microsoft Windows‘ning kelajagi haqida o‘z qarashlarini bayon etdi. Kompaniyaning bashoratlariga ko‘ra, 2030 yilga kelib shaxsiy kompyuterlarni boshqarishda asosiy rolni sunʼiy intellekt o‘ynaydi. Odatdagi sichqoncha va klaviatura o‘rniga foydalanuvchilar kompyuter bilan ovoz va ko‘p qirrali buyruqlar yordamida muloqot qilishadi. Microsoft ishonch bilan aytadiki, besh yildan so‘ng operatsion tizimni boshqarishning anʼanaviy usuli hozirgi Z avlodi uchun DOS‘da ishlash qanchalik eskirgan bo‘lsa, shunchalik eskirgan tuyuladi.
Yangi videoda Microsoft kiberxavfsizlik bo‘yicha mutaxassislar vazifasini bajarishi mumkin bo‘lgan sunʼiy intellekt agentlari paydo bo‘lishini bashorat qilmoqda. Bu agentlar Teams platformasi orqali ishchi guruhlar va yig‘ilishlarda qatnashib, o‘zlarini haqiqiy xodimlar kabi tutadi. Microsoft korporativ vitse-prezidenti Devid Ueston aytishicha, sunʼiy intellekt xodimlarga yana-da ijodiy va strategik vazifalarga eʼtibor qaratish imkonini beradi.
Kelajakda Windows ko‘p qirrali (multimodal) o‘zaro hamkorlikni qo‘llab-quvvatlaydi. Operatsion tizim nafaqat ovozli buyruqlarni qabul qiladi, balki foydalanuvchi nimani tomosha qilayotganini ko‘rishi va atrofdagi tovushlarni eshitishi ham mumkin bo‘ladi. Bularning barchasi murakkab vazifalarni bajarish va kompyuter bilan muloqotni tabiiy holga keltirish imkonini beradi. Bunday yondashuv, Microsoft fikriga ko‘ra, tizim bilan o‘zaro aloqani yana-da tushunarli va qulay qiladi.
Foydalanuvchilar Windows‘ni ovoz bilan boshqarish g‘oyasiga unchalik qiziqish bildirmadi – Windows 2030 taqdimoti haqidagi video “layk”lardan ko‘ra ko‘proq “dizlayk” belgilarini oldi. Shubhalanuvchilar yaqin besh yil ichida sichqoncha va klaviatura o‘z o‘rnini ovoz va imo-ishoralarga butunlay bo‘shatib berishiga ishonishmayapti.
Microsoft ilgari ham sunʼiy intellekt funksiyalarini vaqtidan oldin eʼlon qilgani uchun tanqidga uchragan. Copilot ishga tushirilgandan so‘ng baʼzi vaʼdalar amalga oshmadi, skrinshotlarni avtomatik ravishda olish uchun mo‘ljallangan Recall funksiyasi esa salbiy munosabatga sabab bo‘lib, kechiktirildi.
Kompaniya OpenAI‘ga 13 milliard dollardan ortiq va boshqa startaplarga yuz millionlab mablag‘ kiritib, sunʼiy intellekt texnologiyalarini rivojlantirishga sarmoya kiritishni davom ettirmoqda. Ushbu investitsiyalar tufayli Microsoft foydalanuvchilar va korporativ mijozlarning imkoniyatlarini kengaytirgan holda sunʼiy intellektni barcha mahsulotlariga joriy etishga intilmoqda.