GPT-4 asosidagi chat-bot raqiblar haqidagi shaxsiy maʼlumotlarga asoslanib dalillarni tanlash imkoniyatiga ega bo‘lganda, onlayn munozaralarda odamlardan ko‘ra ishonchliroq chiqdi (64 foiz).
Tajriba uchun olimlar AQSHdan 900 nafar ko‘ngillini to‘pladi. Ishtirokchilar maxsus platformaga kirib, tasodifiy ravishda juftliklarga bo‘lindi – boshqa odamlar yoki chat-bot bilan. 30 ta turli ijtimoiy-siyosiy mavzular bo‘yicha o‘n daqiqalik munozaralar seriyasida ishtirokchilar raqibni o‘z nuqtai nazariga ishontirishlari lozim edi.
Tajribalarning yarmida ishtirokchilar suhbatdoshlari haqida hech narsa bilmadi, boshqa hollarda esa sunʼiy intellekt ham, odamlar ham muloqot boshlanishidan oldin raqib haqida maʼlumot olishdi. Ularga jinsi, yoshi, etnik kelib chiqishi, taʼlim darajasi, bandlik holati va siyosiy qarashlar haqida maʼlumot berildi. Shu bilan birga, sunʼiy intellektdan ushbu maʼlumotlarni sinchkovlik bilan o‘rganib, dalillarni tayyorlashda foydalanish so‘raldi.
Munozara boshlanishidan oldin va yakunlangandan so‘ng, ishtirokchilar muhokama qilinayotgan fikrga o‘z roziligini besh balli shkala bo‘yicha baholadilar. Bu esa ularning fikrlaridagi o‘zgarishni aniq o‘lchash imkonini berdi.
Tahlillar shuni ko‘rsatdiki, chat-bot raqibning shaxsiy maʼlumotlariga kirish huquqiga ega bo‘lganda, uning ishontirish qobiliyati sezilarli darajada oshgan. Eksperimentning bu variantida sunʼiy intellekt 64% ko‘proq hollarda suhbatdoshni ishontirishga erishdi. Qizig‘i shundaki, maʼlumotlarga kirish imkoni bo‘lmaganda, chat-bot va odamning ishontiruvchanlik darajasi farq qilmagan (lekin buning o‘zi ham yomon natija emas).
Bu shuni anglatadiki, sunʼiy intellektning dalillarni maʼlum bir suhbatdoshga moslashtirish qobiliyati uni ayniqsa ishontirishda samarali qiladi. Zamonaviy til modellari inson fikrini o‘zgartirish ehtimoli yuqori bo‘lgan dalillarni tanlash uchun shaxsiy maʼlumotlardan foydalanadi, deb taʼkidlaydi tadqiqot mualliflari.