OpenAI rahbari Sem Altmanning ta’kidlashicha, umumiy sun’iy intellekt (AGI) rivojlanishi odatiy shakldagi ish o‘rinlarining yo‘qolishiga olib kelishi va mavjud iqtisodiyotni xavf ostiga qo‘yishi mumkin. Bu so‘zlar foydalanuvchining kichik ko‘rsatmalari bilangina mustaqil ishlay oladigan yangi GPT-5.5 modelining yaqinda taqdim etilishi fonida yangradi.
“AGI paydo bo‘lgach, hech kim ishlamaydi va iqtisodiyot qulaydi”, — deb yozdi Altman X tarmog‘ida. Shu postning o‘zida u kinoyali mulohazasini ham qo‘shib qo‘ydi: “Men polifazali uyquga o‘tyapman, chunki Codex’dagi GPT-5.5 shunchalik ajoyibki, buncha uzoq uxlab, ishni o‘tkazib yuborishga yo‘l qo‘ya olmayman”.
Bu bayonot OpenAI bugungi kundagi eng ilg‘or deb atayotgan yangi GPT-5.5 modeli chiqqanidan ko‘p o‘tmay yangradi. Kompaniya ma’lumotlariga ko‘ra, tizim foydalanuvchilarning niyatlarini yaxshiroq tushunadi, ko‘p bosqichli vazifalarni uddalay oladi, harakatlarni rejalashtirishni va insonning minimal ishtirokida raqamli vositalardan foydalanishni biladi. Bu esa uni to‘laqonli SI-agenti formatiga yaqinlashtiradi.
Tvit e’lon qilinishidan bir necha hafta oldin, 6-aprel kuni OpenAI “Intellekt davri uchun sanoat siyosati” nomli 13 sahifalik hujjatni e’lon qildi. Unda davlat farovonligi jamg‘armasini tashkil etish, ish haqini kamaytirmagan holda to‘rt kunlik ish haftasining pilot dasturlarini sinovdan o‘tkazish, shuningdek, soliq yukini mehnatdan kapitalga ko‘chirish kabi choralar taklif qilingan. Bundan tashqari, hujjatda robotlarga soliq solish g‘oyasi ko‘rib chiqilgan va sun’iy intellektdan foydalanishni xuddi elektr energiyasi yoki internet kabi tayanch infratuzilmaga aylantirishga chaqirilgan.
Shuningdek, The New Yorker nashrining ko‘plab intervyular va ichki hujjatlarga asoslangan surishtiruvi ham e’lon qilindi. Materialda Sem Altman manipulyatsiyaga moyil va etika me’yorlariga bepisand yetakchi sifatida ko‘rsatilgan. Mualliflar OpenAI’da xavfsizlik mexanizmlari qanday qilib tizimli ravishda izdan chiqarilganini — direktorlar kengashiga soxta hisobotlar berishdan tortib, asosiy jamoalarni tarqatib yuborishgacha batafsil tasvirlab berishgan.