Microsoft kompaniyasi 2025 yilning 14 oktyabridan boshlab mashhur Windows 10 operatsion tizimini qo‘llab-quvvatlashni rasman yakunlashini maʼlum qildi. Ushbu sanadan so‘ng tizim uchun dasturiy taʼminot, xavfsizlik yangilanishlari va texnik yordam ko‘rsatilmaydi.
Bu foydalanuvchilar uchun nimani anglatadi?
Windows 10 o‘rnatilgan kompyuterlar 2025 yil 14 oktyabrdan keyin ham ishlashda davom etadi. Biroq, Microsoft ogohlantirishicha, xavfsizlik yangilanishlarisiz qolgan tizimlar viruslar, zararli dasturlar va boshqa kibertahdidlar uchun himoyasiz bo‘lib qoladi. Shu sababli, kompaniya barcha foydalanuvchilarga zamonaviy xavfsizlik talablariga javob beradigan va yuqori barqarorlikni taklif qiluvchi Windows 11 operatsion tizimiga o‘tishni qatʼiy tavsiya qilmoqda.
Microsoft 365 ilovalari taqdiri nima bo‘ladi?
Windows 10‘ni qo‘llab-quvvatlash tugashi bilan bir qatorda, Microsoft 365 (sobiq Office 365) ilovalariga ham taʼsir qiladi.
- Yangi funksiyalar to‘xtatiladi: Windows 10 foydalanuvchilari uchun Microsoft 365 (Outlook, Teams, Office, OneDrive, SharePoint kabi ilovalar)ning yangi funksiyalarini taqdim etish 2026 yilning avgustidan boshlab to‘xtatiladi.
- Xavfsizlik yangilanishlari davom etadi: Shunga qaramay, Microsoft foydalanuvchilarning Windows 11‘ga o‘tish jarayonida xavfsizligini taʼminlash maqsadida, Windows 10 uchun Microsoft 365 ilovalarining xavfsizlik yangilanishlarini 2028 yilning oktyabrigacha taqdim etishda davom etadi.
- Ishonchlilik pasayishi mumkin: Word, Excel va boshqa dasturlar ishlashda davom etsa-da, qo‘llab-quvvatlash to‘xtatilgandan so‘ng ularning samaradorligi va ishonchliligi pasayishi mumkin.
Xulosa qilib aytganda, Windows 10 foydalanuvchilari uchun o‘z qurilmalari va maʼlumotlari xavfsizligini taʼminlash maqsadida 2025 yil 14 oktyabrgacha Windows 11‘ga o‘tish yoki yangi kompyuter xarid qilish eng maqbul yechim hisoblanadi.