Qozog‘istonda sunʼiy intellektdan foydalanish qoidalari ilk bor qonun darajasida belgilab qo‘yilishi mumkin. Majlisda muhokama qilinayotgan “Sunʼiy intellekt to‘g‘risida”gi qonun loyihasi mamlakatda bu texnologiyaning rivojlanishini rag‘batlantirish bilan birga, inson huquqlari va xavfsizligini himoya qilishni ham ko‘zda tutadi.
Hujjatda eng katta cheklov sifatida odamlarning roziligisiz ularning his-tuyg‘ulari va xulq-atvorini sunʼiy intellekt yordamida tahlil qilishga yo‘l qo‘yilmasligi belgilangan. Shuningdek, texnologiya orqali zaif guruhlardan foydalanish yoki jamoat joylarida real vaqt rejimida yuzlarni aniqlash mumkin emas. Faqat qonunda ko‘rsatilgan maxsus holatlargina istisno qilinadi.
Qonun loyihasi, shuningdek, mualliflik huquqlarini himoya qilish va sunʼiy intellekt tizimlari faoliyatidan kelib chiqqan zarar uchun javobgarlikni ham tartibga soladi. Yaʼni, sunʼiy intellekt yordamida yaratilgan har qanday kontent tegishli belgilarga ega bo‘lishi shart, bu esa uning asl manbasini aniqlash va huquqiy nizolarning oldini olish imkonini beradi.
Bu tashabbuslar bilan bir vaqtda Qozog‘iston Milliy sunʼiy intellekt platformasini ishga tushirishga ham tayyorlanmoqda. Yagona infratuzilma sifatida ko‘zda tutilgan bu platforma modellarni o‘qitish uchun maʼlumotlar bazalariga kengroq kirish imkoniyatini yaratadi hamda mahalliy ishlab chiquvchilarni qo‘llab-quvvatlaydi. Maqsad – sunʼiy intellekt sohasida milliy ekotizimni kuchaytirish va mahalliy ishlanmalarni global raqobatga tayyorlash.
Shu tarzda Qozog‘iston sunʼiy intellektni rivojlantirishda muvozanatli yo‘lni tanlamoqda: ishlab chiquvchilar uchun qulay sharoit yaratish bilan birga, inson huquqlari va jamiyat xavfsizligini ham qatʼiy qonun orqali taʼminlash rejalashtirilmoqda.