TikTok‘ning Londondagi bo‘linmasi Buyuk Britaniyada xalqaro texnologiya kompaniyalaridan xavfli materiallar tarqalishining oldini olishni talab qiluvchi «Internet xavfsizligi to‘g‘risidagi qonun» kuchga kirayotgan bir paytda moderatsiya va kontent xavfsizligi bilan shug‘ullanuvchi yuzlab xodimlarni ishdan bo‘shatishga tayyorlanmoqda. Kompaniya «kontentni moderatsiya qilish faoliyatini global qayta tashkil etish doirasida jamoaviy maslahatlashuv jarayonini boshlayotganini» maʼlum qildi.
Buyuk Britaniya, shuningdek, Janubiy va Janubi-Sharqiy Osiyoda TikTok‘ning ishonch va xavfsizlik bo‘limidagi bir necha yuz ish o‘rni qisqartiriladi. Kompaniya vakili taʼkidlaganidek, «katta til modellarini takomillashtirish kabi texnologik yutuqlar bizning yondashuvimizni o‘zgartirmoqda.»
Ushbu qadam Buyuk Britaniyaning «Internet xavfsizligi to‘g‘risida»gi qonunining asosiy qoidalari kuchga kirganidan bir necha hafta o‘tgach amalga oshirildi. Mazkur qonunga ko‘ra, kompaniyalar potensial xavfli kontentga kirishga urinayotgan foydalanuvchilarning yoshini tekshirishni joriy etishlari shart. Xavfli va noqonuniy materiallarni zudlik bilan olib tashlash bo‘yicha yangi talablarga rioya qilmagan kompaniyalar 18 million funt sterlinggacha yoki jahon aylanmasining 10 foizi miqdorida (qaysi biri ko‘p bo‘lsa) jarimaga tortilishi mumkin.
O‘tgan oyda TikTok 18 yoshdan kichiklarga zararli kontent taʼsirini cheklash bo‘yicha so‘nggi talablarga javob berish uchun yangi «yosh nazorati» qoidalarini joriy etdi. Boshqa ijtimoiy tarmoqlar singari, TikTok ham saytdan foydalanish tarixi va muloqot doirasi asosida foydalanuvchining yoshini aniqlash uchun mashinali o‘rganish texnologiyalaridan foydalanishni rejalashtirmoqda. Biroq, ushbu sunʼiy intellektga asoslangan tizimlar hali regulyator tomonidan tasdiqlanmagan.
TikTok xodimlarni ishdan bo‘shatish to‘g‘risidagi qaror Xitoy texnologik guruhining Yevropadagi faoliyatini optimallashtirish bo‘yicha keng ko‘lamli saʼy-harakatlari fonida qabul qilindi. Kompaniya alohida bozorlarda moderatorlar guruhlarini qisqartirish yoki yopish va ushbu funksiyalarni Dublin va Lissabon kabi mintaqaviy markazlarda markazlashtirishga alohida eʼtibor qaratmoqda. Shu oyda Berlindagi TikTok ishonch va xavfsizlik jamoasi yopildi.
TikTok vakili shunday dedi: «Biz o‘tgan yili boshlangan qayta tashkil etishni davom ettirmoqdamiz. Bu bizning global ishonch va xavfsizlik operatsion modelimizni mustahkamlash uchun mo‘ljallangan bo‘lib, butun dunyo bo‘ylab kamroq joylarda faoliyatimizni jamlashni o‘z ichiga oladi. Bunda texnologik yutuqlardan foydalangan holda kompaniya uchun muhim bo‘lgan ushbu funksiyani maksimal darajada samarali va tez rivojlantirishga eʼtibor qaratiladi.»
Aloqa xodimlari kasaba uyushmasining milliy tashkilotchisi Jon Chadfildning ishonchi komilki, kompaniya shunchaki o‘z faoliyatini arzonroq ishchi kuchiga ega bo‘lgan yurisdiksiyaga ko‘chirishni rejalashtirmoqda. «Ularga moderator-odamlar kerak emas, ularning maqsadi – bularning barchasini sunʼiy intellektga topshirish,» – dedi u. «Sunʼiy intellekt ular aqlli va ilg‘or ekanligi haqida taassurot qoldiradi, lekin aslida ular shunchaki uni mamlakatdan tashqariga olib chiqmoqchi.»
TikTokʼdagi qisqartirishlar Buyuk Britaniya va Yevropada kompaniya daromadlarining davom etayotgan o‘sishi fonida sodir bo‘lmoqda. Kompaniyaning 2024 yildagi daromadi yillik hisobda 38 foizga o‘sib, 6,3 milliard dollarni tashkil etdi, soliq to‘lashdan oldingi zararlar esa 2023 yildagi 1,4 milliard dollardan o‘tgan yili 485 million dollargacha kamaydi.