Albaniya davlat boshqaruvida tarixiy qadam tashladi: mamlakatda dunyodagi birinchi sunʼiy intellekt vazir — “Diella” ish boshladi. Bosh vazir Edi Ramaning maʼlum qilishicha, albanchada “quyosh” maʼnosini anglatuvchi bu virtual vazir davlat xaridlari tizimini boshqaradi va korrupsiyaga qarshi kurashda asosiy vositaga aylanadi.
Diella — inson emas, balki anʼanaviy alban libosidagi yosh ayol qiyofasidagi raqamli avatardir. Uning asosiy vazifasi — davlat tenderlari bo‘yicha qarorlarni inson omilisiz, faqat maʼlumotlarga tayanib qabul qilish. “Bu ilmiy fantastika emas. Diella davlat mablag‘larini 100 foiz shaffof va toza tender jarayoni orqali yo‘naltiradi”, — deya taʼkidladi Edi Rama.
Aslida, Diella Albaniya fuqarolariga allaqachon tanish: u shu paytgacha elektron davlat xizmatlarini birlashtiruvchi e-Albania platformasini boshqarib kelgan. Endi uning vakolatlari kengayib, tenderlarni baholash, mahalliy va xalqaro isteʼdodlarni jalb qilish hamda davlat boshqaruvidagi byurokratik to‘siqlarni bartaraf etish kabi muhim yo‘nalishlarni ham qamrab oladi.