Xitoyning MiniMax startapi real ish vazifalarini hal qilishga mo‘ljallangan yangi sun’iy intellekt modeli – MiniMax M2.1 ni taqdim etdi. U nafaqat ko‘plab tillarda kod yozadi, balki mustaqil «raqamli xodim» sifatida ham faoliyat yuritadi: interfeyslarni boshqaradi, jadvallardagi ma’lumotlarni tahlil qiladi va matnli buyruqlar orqali to‘liq ofis jarayonlarini bajaradi.
Dasturlash sinovlarida MiniMax M2.1 raqobatchisi Claude Sonnet 4.5 dan ustun keldi. Qo‘shimcha ustunlik esa narxda namoyon bo‘ldi: M2.1 da tokenlarni qayta ishlash va generatsiya qilish narxi Claude modellariga qaraganda taxminan o‘n baravar arzon.
Kompaniyaning ta’kidlashicha, oktabr oyida chiqqan M2 versiyasi asosan arzonlik va qulaylikka yo‘naltirilgan bo‘lsa, yangi M2.1 unumdorlik va amaliyotga urg‘u beradi. Model real ish sharoiti uchun maxsus yaratilgan: u nafaqat kod yozishi, balki murakkab yo‘riqnomalarga amal qilishi va boshqa tizimlar bilan integratsiyalashuvi lozim.
Ko‘p tilli dasturlash va UI/UX. Asosiy yangiliklardan biri – ko‘p tilli dasturlashni qo‘llab-quvvatlashdir. Zamonaviy mahsulotlar bir til bilan cheklanmasligini inobatga olib, M2.1 Rust, Java, Go, C++, Kotlin, Objective-C, TypeScript va JavaScript tillarida yanada samarali ishlaydigan qilindi. Shuningdek, veb va mobil ishlanmalar sohasida ham o‘sish bor: model Android va iOS uchun nativ ilovalar yarata oladi, interfeys dizayni va vizual estetikani yaxshiroq tushunadi.
«Raqamli xodim» funksiyasi MiniMax M2.1 ga mustaqil ofis agenti bo‘lish imkonini beradi. Model ekrandagi holatni tahlil qiladi va matnli buyruqlar asosida interfeysni boshqaradi (sichqoncha va klaviatura harakatlarini imitatsiya qiladi). Natijada u ma’lumot yig‘ish, hujjatlar bilan ishlash va korporativ tizimlardan foydalanish kabi murakkab vazifalarni insonsiz bajara oladi.
Texnik xususiyatlari: M2.1 «Aralash ekspertlar» (Mixture of Experts, MoE) arxitekturasiga asoslangan. Umumiy 230 milliard parametrdan har bir token uchun faqat 10 milliardi faollashadi. Bu yirik modelning aqliy salohiyatini saqlagan holda, kichik modellar kabi tez va arzon ishlash imkonini beradi.
Natijalar va narx. Samaradorlik SWE-Multilingual testida tasdiqlandi: model 72,5% natija bilan Claude Sonnet 4.5 ni ortda qoldirdi va Claude Opus 4.5 ga yaqinlashdi. Ilovalarni «noldan» yaratishni baholash uchun ishlab chiqilgan yangi VIBE benchmarkida esa M2.1 o‘rtacha 88,6 ball to‘pladi.
Narx borasida MiniMax M2.1 yaqqol yetakchi: 1 million kirish tokeni – $0,30, generatsiya esa $1,20 turadi.