OpenAI o‘zining mashhur ChatGPT chat-boti uchun ota-ona nazorati vositalarini ishga tushirdi. Bloomberg nashrining yozishicha, bu qaror bahorda o‘z joniga qasd qilgan va bundan avval chat-botdan murabbiy sifatida foydalangani aytilgan o‘smir bilan bog‘liq sud daʼvosidan so‘ng qabul qilingan.
Yangi funksiyalar barcha foydalanuvchilar uchun ochiq bo‘lib, ular ota-onalarga farzandlarining chat-botdan foydalanishini nazorat qilish va cheklash imkonini beradi. Xususan, agar ChatGPT suhbat davomida o‘smirning stress holatida ekanini aniqlasa, tizim bu haqda ota-onalarga avtomatik ravishda xabarnoma yuboradi.
Bundan tashqari, sozlamalar orqali kunning maʼlum vaqtlarida xizmatdan foydalanishni taqiqlash ham mumkin. Bu orqali ota-onalar farzandlarining chat-bot bilan muloqot vaqtini cheklashlari mumkin bo‘ladi.
OpenAI‘ning ushbu tashabbusi foydalanuvchilar xavfsizligini oshirish va jamoatchilik ishonchini mustahkamlash yo‘lidagi navbatdagi qadam sifatida baholanmoqda.